Latest News

ORANJESTAD, Aruba: 19 Augustus 2024 – E Comite di Medio Ambiente di Aruba Hotel and Tourism Association (AHATA) a organisa un seminario tituta "Shaping Sustainability in Tourism", cu e meta pa duna profesionalnan den e industria di turismo informacion tocante e mihor practicanan den un operacion commercial. Participantenan a descubri strategianan actual pa integra sostenibilidad den e operacion di nan compania, asina stimulando practicanan responsabel.  

E evento a atrae un grupo diverso di participante, y a crea un ambiente di colaboracion caminda “like-minded professionals” por a conecta y interactua directamente y intercambia recomendacion. E seminario a consisti di 7 diferente speakers, miembronan di AHATA su Comite di Medio Ambiente, ken a comparti nan conocemento riba varios aspecto di sostenibilidad y certificacionnan ambiental.  

Un punto cu a resalta di e evento, tabata e panel di discusion. E panel a consisti di invitadonan special: Nathaly Stanley, Senior Certification & Membership Care Manager di Green Globe Certification, y Jurgen van Schaijk, Managing Director di Amsterdam Manor Beach Resort Aruba. Nathaly a comparti su conocemento como un representante di Green Globe, y Jurgen a añadi su experiencia cu e certificacion di EarthCheck, mirando cu Amsterdam Manor Beach Resort Aruba ta EarthCheck certified pa 25 aña. E panel a trece dilanti informacion valioso tocante e procesonan di certificacion, como tambe e importancia y beneficionan di adheri na standardnan ambiental reconoci mundialmente. 

Cu e evento aki, AHATA su Comite di Medio Ambiente ta continua cu nan esfuersonan pa educa nan mas di 150 miembro den e tema di sostenibilidad, y motiva accion colectivo pa por sigui crea un industria di turismo cu ta enfoca riba reduccion di “carbon footprint”.  

AHATA ta gradici Nathaly Stanley y Jurgen van Schaijk pa forma parti di e panel, y tur speaker cu a presenta nan gran conocemento y a forma parti esencial di e evento aki: 

• Crescenzia Biemans, Chief Corporate Officer di Bucuti & Tara Beach Resort 
• Rik van der Berg, Resort Manager di Bucuti & Tara Beach Resort 
• Ramsey Halibi, Operations Manager di New York Laundry 
• Ryan Bareño, Director of Operations di Marriott's Aruba Surf Club 
• John Wardlaw, Lead Technical Analyst di Tropical Bottling Company 
• Jareth Vermeulen, Sustainability Alliances Manager, di Iberostar Beachfront Resorts 
• Sandy Ras, Engineer Supervisor di La Cabana Beach Resort & Casino 

Pa mas informacion tocante e iniciativanan di AHATA su comite di Medio Ambiente por bishita facebook.com/AHATAEnvironmentalCommittee.