Latest News

ORANJESTAD, Aruba: 1 November 2023 – Aruba Hotel & Tourism Association (AHATA) a celebra e logro di 131 supervisor y hefe di departamento cu a completa un tayer ofreci den colaboracion cu CHTA Education Foundation (CHTAEF). Siman pasa, e participantenan a atende e ceremonia di certificacion na La Cabana Beach Resort.

E tayer titula “Own Your Supervisory Authority Responsibly” a tuma forma di un bootcamp dinamico di 2 dia. E grupo di participante a consisti di gruponan di varios hotel, pero tambe restaurant, timeshare, benta y vacation rentals. E bootcamp facilita pa CHTAEF, a wordo diseña pa empodera personanan cu rolnan di supervicion pa eherce nan trabou como lider responsabelmente.

E ceremonia a habri cu palabranan di Sra. Tisa LaSorte, Presidente & CEO di AHATA, ken a expresa alegria den e cantidad grandi di participante y orguyo pa nan compromiso pa excelencia den e sector di turismo. Sr. Ewald Biemans, doño di Bucuti & Tara Beach Resort, y representante di CHTAEF tambe a comparti palabra di motivacion y a entrega e participantenan cu nan certificacion hunto cu Sra. LaSorte. E anochi a conclui cu palabranan di Sra. Ronella Croes, CEO di Aruba Tourism Authority, felicitando tur participante y recordando nan e gran balor di nan contribucion pa nos isla.

E exito di e bootcamp ta representa un otro logro importante pa AHATA, reflehando nan vision y enfuerzo pa promove un turismo prospero y responsabel pa tur. E asociacion ta comprometi pa contribui na e exito di e sector, door di sigui inverti den e desaroyo di su miembronan y di nos forsa laboral den e sector di hospitalidad.

AHATA ta gradici Eagle Aruba Resort, La Cabana Beach Resort y Divi Village Golf & Beach Resort pa nan sponsorship di e bootcamp.